Эҕэрдэлиибит Петров Николай Павловичы!

theatre 052

Күндү Николай Павлович!

Эн кыһамньыгынан, күүстэээх санааҕынан, тэрийэр талааҥҥынан СҮҮРБЭ сыллааҕыта Саха национальнай оркестра аан маҥнай тэриллибитэ. Аан маҥнай Улуу Туймаада үрдүнэн саха омук алыптаах музыкатын көмүс дорҕоонноро кыырайа көппүттэрэ.

Ол күнтэн саха бастакы композитордара Адам Скрябин, Федор Корнилов, Марк Жирков саха музыкатын сайдыытыгар сахпыт кыымнара сарыал-кутаа буолан сириэдийэ умайбыта!

Эн дорҕоонуҥ эрчимирэ көтөр
Орулуос куһугурас дохсунунан.
Арыт чап-чараастык намылыйар
Хатыҥҥа ыйаммыт хаар кыыма буолан!
Арыт тохтор көмүс толбоннонор,
Арыт күн сардаҥата куйахтанар,
Арыт уордаах этиҥ доҕуһуолланар,
Арыт курбуу чаҕылҕан аргыстанар!
Эн дорҕоонуҥ ымманыйа туонар
Этиллибэтэх сырдык таптал туһунан,
Оччоҕо дьон сүрэҕэ дьоллонор,
Эппэйэр тааллыбатах тапталынан!

Күндү доҕорбут Николай Павлович! Сүүрбэ сыл устата көмүс дорҕооннортон күүс мунньуммут хотоҕойуҥ кытаатан өссө үрдүккэ кыырайа көт, бар дьонуҥ сүрэҕин дьоллоо! Эйиигин һСаха Кыайыытын маршаһ олоҕуҥ тухары доҕуһуоллаатын!

Олоҥхо театрын коллектива
Муус устар 26 күнэ, 2013 cыл. Улуу Туймаада

 

Эҕэрдэлиибит Кузьмина Анна Ивановнаны!

1300198733 kuzmina-anna-ivanovna f4c0f

РСФСР Үтүөлээх, Саха Республикатын народнай артыыската Ытыктабыллаах Анна Ивановна!

Орто туруу дойдугар
Оҕо буолан улаатан,
Киһи буолан киэркэйэн,
Талбыт курдук талааннаах
Артыыс буолан аатыран,
Айхаллаах сааскар диэри
Айа – тута сылдьаргынан,
Истиҥник эҕэрдэлиибит!

Икки атахтаах кэрэ, дьикти, дьиибэ дьахталларын уобарастарын,
Үйэлэргэ умнуллубаттыы умсулҕаннаахтык илбистээн,
Иччилээн айан көрөөччүлэргэр бэлэхтээбит кэрэ түгэннэриҥ
Биһиэхэ оскуолабыт, киэн туттуубут буолар.

Олоҥхо театрын бар дьоно

Муус устар 20 күнэ, 2013 с.
Улуу Туймаада Эбэ Хотун

 

Эҕэрдэлиибит Никитина Любовь Алексеевнаны!

nikitina 22437

Күндүтүк саныыр үөлээннээхпит Любовь Алексеевна!

Намчы хотугу сибэкки курдук,
Нарын талааҥҥытынан
Бар дьоҥҥутун үөрдэҕит,
Аан дойдуну сүгүрэтэҕит!
Үгүс сыл дьаныһан хомуйан,
Чочуйан, сыанаҕа туруортаабыт,
Дохсун ытыс тыаһынан
Доҕуһуолламмыт үҥкүүлэргит
«Хотугу үҥкүүлэр» диэн
Кинигэ буолан тахсыыта
Аҕыйах ахсааннаах
Хотугу омуктар культуралара
Өлбөт-сүппэт үйэлээх
Буолуутугар улахан кылаат!
Сааскы туундара
Араас дьикти сибэккинэн
Симэнэринии
Айар талааҥҥыт үүнэ,
Чэчирии туруохтун!
Эһиги үҥкүүлэргитигэр
Туундара туруйалара
Турууктаатыннар
Кыырай халлаан
Кыталыктара
Кылбаҥнаатыннар!
Саргы-дьаалы!
Нөрүөн-нөргүй!
Буолуохтун!

Олоҥхо театрын бар дьоно

Муус устар 17 күнэ, 2013 с.
Улуу Туймаада Эбэ Хотун

 

 

Эҕэрдэлиибит Власов Виталий Гаврильевичы!

vlasov 3121f

Ытыктабыллаах Битээлий, Хабырылла уола!

Бииргэ үлэлиир үөлээннээх доҕотторуҥ Олоҥхо тыйаатырын үлэһиттэрэ Эйиигин биир дойдулааҕыҥ Улуу Бэйиэт, Улуу Бөлүһүөк Былатыан Ойуунускай 1934 сыллаахха төрүттэспит Арассыыйа Суруйааччыларын Сойууһун чилиэнэ буолбуккунан ис сүрэхпититтэн үөрэн, долгуйан эҕэрдэлиибит уонна Эн талааҥҥын, хомоҕой хоһооҥҥун, иэйиилээх ырыаҕын Улуу Москуба Эбэ Хотун билиниитин курдук сыаналыыбыт!

Үөлээннээх доҕорбут Хабырылла уола Битээлий!

Бар дьонуҥ билиниитин ылынан, Айар Атыҥ хотоҕойо кытаатан өссө үрдүккэ, кэрэҕэ кыырайа көттүн, саха киһитин уйан кылын таарыйан ытата, ыллата, хоодуот, хорсун санаалата хомоҕой хоһоонуҥ кутулла туруохтун, ылбаҕай ырыаҥ кыырайа көтүөхтүн! Хас саха сүрэҕин ортотунан көтүтэн ааспыт «Сахаҥ атыгар» олорон тоҥору-хатары билбэккэ сытыы тыаллыын сырсан ис! Эйиэхэ аастыйбыт бастаах Улуу Аартыктар арыллан истиннэр, чөҥөрүйэр чүөмпэлэри, аҥхалаат аппалары Кынаттаах Атыҥ таарыйбакка аһары көтүтүөхтүн! Санньыйбыты сааскы тыалынан сайа оҕус! Ыалдьыбыты ымыы буолар ырыаҕынан сэргэхсит!
Үөлээннээх доҕорбут Битээлий, Хабырылла уола!

Саха Улуу бэйиэтэ Сэмэн Дайыылап эппит кэрэкэ тыллара Эйиэхэ олоҕуҥ оҥкула буолуохтунар!
Ойон тур күнү кытта!
Уонна, күүскүн баттаһа,
Уһаппакка ай, таптаа –
Ол олох муудараһа!

Олоҥхо тыйаатырын үлэһиттэрэ

 

Эҕэрдэлиибит Баранова Софья Иннокентьевнаны!

1300263870 baranova-sofya-innokentevna 2bc88

Дьэ, бу!
Охтон бараммат мастаах, устан бараммат уулаах, кэрээбэт кэҕэлээх, өрөөбөт өтөннөөх Олоҥхо эйгэтин маанылаах кыыһа!
Үөлээннээх дьүөгэбит Суонньа!

Эйигин биир идэлээхпитин, үөлээннээх доҕорбутун олоххор буолан ааһар кэрэ-бэлиэ күҥҥүнэн ис сүрэхпититтэн эҕэрдэлиибит!
Улуу Москуба куоракка кэрэни, үтүөнү бар дьоҥҥор тириэрдэр үөрэх кыһатын бүтэрэн кэлиэххиттэн Саха тыйаатырыгар кыаххын, талааҥҥын барытын анаан үлэлииргин үөлээннээхтэриҥ уонна саха көрөөччүлэрэ үрдүктүк сыаналыыллар.
Эн талааннаах артыыска эрэ буолбакка уран тарбахтаах уус, худуоһунньук буоларгын сөҕө, махтайа, киэн тутта көрөбүт.
«Уол куолакал» испэктээкили ийэ куккар иитиэхтээн, суруйан, туруоран уонна бэйэҥ оонньоон саха мындыр сыанаһыт, хаппырыыс кириитик, үчүгэйи ис сүрэҕиттэн ылынар көрөөччүтүгэр таһаарбыккын талааныҥ өрөгөйүҥ курдук сыаналыыбыт.
Үөлээннээх дьүөгэбит Суонньа!
«УОЛ КУОЛАКАЛЫҤ» өргө диэри лоҥкунаатын! Кэрэни, үйэлээҕи бар дьонуҥ сүрэҕэр тириэртин!
Саргы-дьаалы, өрөгөй-талаан буолуохтун!
Дом ини дом!

Үөлээннээх доҕотторуҥ,
Орто бараан дойду олохтоохторо,
«Олоҥхо» тыйаатырын кэллэктиибэ.

Ахсынньы 21 күнэ, 2012 сыл
Дьокуускай

 


Страница 41 из 42

Иван Шакуров

И.Ю. Пестряков

Афиша

"Туйаарыма Куо" (Китай) в исполнении Пекинского театра опера Куньцю
«Светлоликая Туярыма Куо» пьеса П.А. Ойунского созданная по сюжету олонхо «Нюргун Боотур Стремительный». История...

Поиск