Кэриэстэбил

Сафонов Николай Иванович - Дьырылы

safonov d1bd1Бүтүн саха норуота ыар сүтүктэннэ... Аан дойдутааҕы ЮНЕСКО сүдү айымньытынан биллэриллибит Улуу Олоҥхобутун тарҕатыыга, харыстааһыҥҥа сүҥкэн кылаатын киллэрбит, олоҥхоһуппут, Николай Иванович Сафонов б. дь. балаҕан ыйын 15 күнүгэр ыарахан ыарыыттан орто дойдуттан туораата.
Көҥүл тустууга ССРС спордун маастара, Саха Өрөспүүбүлүкэтин үтүөлээх тренерэ, Саха Өрөспүүбүлүкэтин бочуоттаах ытык кырдьаҕаһа, өрөспүүбүлүкэ үөрэҕириитин бочуоттаах бэтэрээнэ, Саха сирин Аан Дархан этээччитэ (2017 с.), Юнеско стипендиата П.Е.Решетников аатынан анал бириис хаһаайына, Сунтаар улууһун, Дьаархан нэһилиэгин Ытык киһилэрэ Николай Иванович Сафонов-Дьырылы 1931 сыл алтынньы 14 күнүгэр Сунтаар оройуонугар Дьаархан нэһилиэгэр төрөөбүтэ. 1954 с. Дьокуускайдааҕы пединститут физикаҕа, математикаҕа факультетын, 1966 сыл Москватааҕы Киин физкультура спорт институтун бүтэрбитэ. Сунтаар улууһугар математика, физкультура учууталынан, 1970 сылтан Дьокуускайга көҥүл тустуу тренеринэн сүүрбэччэ сыл устата үлэлээбитэ.

xfghngn aefe3Сүүрбэ сааһыттан күүстээх кэрэ куолаһа, дьүрүскэн кылыһаҕа биллибитэ, туойар, үҥкүү тылын этэр буолбута. 1957 с. өрөспүүбүлкэтээҕи ыччаттар фестивалларыгар оһуохай куонкуруһугар үҥкүү тыла этэн II миэстэ буолбута. 1997 сылтан оһуокай түмсүү чилиэнэ. 1992 с. Үөһээ Бүлүүгэ үҥкүү тыла этээччилэр өрөспүүбүлүкэтээҕи куонкурстарыгар С.А. Зверев бирииһин ылбыта. 1993 сылтан - “Дархан этээччи”. Сынньалаҥҥа тахсан баран 1987-2009 сылларга Дьокуускайга Оҕо саас Дыбарыаһыгар сахалыы ырыа-тойук уһуйааччытынан үлэлээбитэ. Ону таһынан музыкальнай, педагогическай училищеларга ыччаттары оһуокайга, тойукка үөрэппитэ, төрөөбүт фольклорун биир бастыҥ тарҕатааччыта буолбута.
2003 сылтан бэйэтэ суруйбут “Чаҕылытта Бэргэн” диэн аныгы тэттик олоҥхотун олоҥхолуур, төрөөбүт тылын уран умсулҕаныгар эдэр ыччаты уһуйар, умсугутар. 2012 с. өрөспүүбүлүкэ олоҥхоһуттарын фестивалыгар Гран-При хаһаайына буолар, бу дьыл Ньурбаҕа Олоҥхо Ыһыаҕар бастыҥ олоҥхоһут анал ааты ылан, Ил Түмэн бэрэссэдээтэлэ А.Н. Жирков илиититтэн кыһыл көмүс чаһынан наҕараадаланар. 2006 с. Саха Өрөспүүбүлүкэтин Президенин грамотатын наҕараадаламмыта.
IMG 20200916 WA0035 70c5cСӨ суруйааччыларын сойууһун чилиэнэ (2014 с.), Сахалыы ырыаны-тойугу уһуйууга аналлаах кинигэлэри суруйбута. “Көмүс Дьүрүһүн”, “Сүмэ тыллар”, “Түөн тыллар”, “Дьон-сэргэ ох тыла”, “Көмүс дьүһүн”, “Хайдах-хайдаҕый?”, “Олоҥхобут тыына – олохпут кыыма”, “Чаҕылытта Бэргэн” кинигэлэр ааптардара.
Аҕа дойду улуу сэриитин сылларыгар килбиэннээх үлэһит иһин мэтээллээх, тыыл бэтэрээнэ.
Николай Иванович үгүс көлүөнэ ыччаты олоҥхоҕо, спорт эйгэтигэр тардан, чиэстээхтик үлэлээбиккит иһин махтанабыт.
Ытыктыыр олоҥхоһуппут Николай Иванович –Дьырылы – умнубаппыт, саныыбыт. Кини дьиэ кэргэнигэр, чугас бары дьонугар дириҥ кутурҕаммытын тириэрдэбит.

Олоҥхо киинин уонна Олоҥхо тыйаатырын бар дьоно

 

 

Вернуться назад  

Иван Шакуров

И.Ю. Пестряков

Афиша

“Өрүс бэлэхтэрэ” испэктээк премьератыгар ыҥырабыт!
Дьокуускай куорат олохтоохторо уонна ыалдьыттара!Өксөкүлээх Өлөксөй үйэлээх үтүө аатын өрө тутан кини аатын сүгэр Норуоттар...
Өксөкүлээх Өлөксөй “Ойуун түүлэ” поэматынан испэктээгэр бар дьоммутун ыҥырабыт!
Саха классик суруйааччыта Алексей Елисеевич Кулаковскай айар үлэтин 120 сылынан Олоҥхо тыйаатыра төрүттэмитэ 12 сыла...

Поиск