ТААТТАЛАР ОЙУУНУСКАЙГА, СУОРУН ОМОЛЛООҤҤО СҮГҮРҮЙДҮЛЭР

IMG 1803 4899bСэмэнэп таҥара күн, балаҕан ыйын 14 күнүгэр, Олоҥхо театрын директора, биллиилээх ырыаһыт, поэт, музыкант Виталий Гаврильевич Власов П.А.Ойуунускай төрөөбүтэ 125 сылынан, норуот суруйааччыта Д.К.Сивцев-Суорун Омоллоон төрөөбүт күнүнэн төрөөбүт дойдутугар, Ытык Таатта сиригэр, Халымнаайы күөл үрдүгэр П.А.Ойуунускай «Оҕо куйуурдуу турара» айымньытынан туруоруллубут пааматынньык таһыгар, «Сэмэйдик кэлэммин сүгүрүйэн, киэпкэбин устабын» диэн ааттаан, Таатта ытык дьонугар сүгүрүйэн, П.А.Ойуунускай айымньыларынан бар дьонугар бэртээхэй дьүһүйүү-кэнсиэри бэлэхтээн барда.

Тэрээһин кыттыылаахтара дьүһүйүү-кэнсиэр иннинэ Ойуун Күөлүгэр тиийэн, Социалистическай Үлэ Геройа, Саха народнай суруйааччыта, Таатта улууһун бочуоттаах гражданина Д.К.Сивцев-Суорун Омоллоон көмүс уһуоҕун үрдүгэр тутуллубут чочуобунаҕа тиийэн, сибэкки дьөрбөтүн уурдулар, кини туһунан үтүө-мааны тылынан ахтан-санаан аастылар.

IMG 1818 75f7dИти кэнниттэн В.Г.Власов П.А.Ойуунускай төрөөбүтэ 125 сылыгар аналлаах дьүһүйүү-кэнсиэрэ саҕаланар. Кэнсиэргэ кыл кылыһах, ох саа инструменнары оҥорбут Р.Габышев, тойуксут, оһуохай таһаарааччы С.Мойтохонова, СӨ үтүөлээх артыыһа, баянист А.Томскай, А.Томская салайааччылаах «Кыл саха» фольклор бөлөҕө, звукорежиссер Леонид Иванов-Лүҥкүр, А.Иванова, олоҥхону толорооччу А.Николаев күүс-көмө буоллулар, музыканан доҕууоллаатылар.

Дьүһүйүү алгыһынан саҕаланна, алгыһы улуус бочуоттаах гражданина И.И.Унаров толордо. Ол кэнниттэн улуус баһылыгын солбуйааччы И.А.Сивцева, Октябрьскай нэһилиэк баһылыга М.Г.Аржаков, улуустааҕы культура управлениетын салайааччыта Г.Г.Вырдылин, «Оҕо куйуурдуу турара» скульптура автора В.Я.Сивцев эдьиийэ И.Я.Жерготова тыл эттилэр.

IMG 1826 e13ebЫрыаһыт В.Г.Власов дьүһүйүүтүн П.А.Ойуунускай «Оҕо куйуурдуу турара» айымньытынан саҕалаата уонна «Кээрэкээн ойуун», «Соломуон Муударай», «Дойду оҕото Дорогунуоп Ньукулай», «Харачаас», «Син биир буолбаат», «Өрүөл кэриэһэ» хоһооннорунан таҥан оҥорбут «Өрүөл кэриэһэ», «Сүүс сыллаах улуу былаан» айымньыларыгар суруйбут дьүһүйүүлэрин, бэйэтэ айбыт «Ойуунускай бырастыы» хоһоонунан дьүһүйүүтүн, А.Чахов «Күөх Таатта үрэҕэр», Турсунай Оразбаева «Мин кэллим Тааттаҕа» ырыаларын толорбутун мустубут дьон дохсун ытыс тыаһынан көрүстүлэр. Дьүһүйүү-кэнсиэр «Таатта үрэх үрдүгэр» ырыанан түмүтэннэ, ырыаны мустубут дьон бары туран эрэ толордулар. Салгыы Таатта кэнэҕэскилээх ыччата Влас Вырдылин П.А.Ойуунускай «Ийэм Дьэбдьикиэй уҥуоҕар» диэн хоһоонун иэйэн-куойан толорбута, хас биирдии киһи дууһатын аймаата, уйулҕатын хамсатта. Ол кэнниттэн А.Николаев уонна С.Мойтохонова «Дьулуруйар Ньургун Боотур» олоҥхоттон быһа тардан толорбуттара, дьон сэҥээриитин ылла. Кэнсиэр П.А.Ойуунускай «Кэтэһии», «Куоттарбыт кутурҕана» хоһоонноругар суруллубут ырыаларынан түмүктэннэ. Бу ырыалары СӨ культураҕа үтүөлээх үлэһитэ К.И.Христофоров салайааччылаах «Үрүйэ» дьахталлар ансаамбыллара уонна улуус аҕа саастаахтарын хора бар дьонноругар бэлэх ууннулар. Тэрээһин тэрээһиҥҥэ кыттыбыт дьону барытын үмүрү тардан. сомоҕолоһуу оһуохайынан түмүктэннэ.

Н.ИОВЛЕВ.

Хаартыскаларга: Д.К.Сивцев чочуобунатыгар; алгыс сиэрэ-туома; мустубут дьону улуус баһылыгын солбуйааччы И.А.Сивцева эҕэрдэлиир; Халымнаайы күөлүн үрдүгэр; В.Г.Власов «Оҕо куйуурдуу турара» скульптура таһыттан дьүһүйүүтүн саҕалаата; кэнсиэри дьон-сэргэ сэҥээрэ көрдө; дьүһүйүү-кэнсиэр түгэнэ; «Таатта үрэх үрдүгэр ырыаны» мустубут дьон сүһүөхтэригэр туран эрэ уопсай толордулар; бэтэрээннэр хордара; сомоҕолоһуу оһуохайа.

Источник: http://ulus.media

Вернуться назад  

Иван Шакуров

И.Ю. Пестряков

Афиша

"Туйаарыма Куо" (Китай) в исполнении Пекинского театра опера Куньцю
«Светлоликая Туярыма Куо» пьеса П.А. Ойунского созданная по сюжету олонхо «Нюргун Боотур Стремительный». История...
Дьырыбына Дьырылыатта
Олоҥхо театра Алтынньы ый 25 күнүгэр киэһэ 1830 чаастан П.П.Ядрихинскай Бэдьээлэ олоҥхотунан "Дьырыбына Дьырылыатта"...

Поиск