Оллоонноон олорон уу курдук суккуйан, аллаах ат айанын, дьоруо ат олугун тэтиминэн омуннаахтык олоҥхолоон, кэпсээн кэҕийэн, чабырҕахтаан чаҥыйан, тойук туойан доллоһутан барда диэҕи тылым тахсыбата. Ити сэтинньи 27 күнүгэр Олоҥхо тыйаатырыгар турбут «Эрбэхчэй Бэргэн» диэн олоҥхо ааптара, олоҥхоһут Валентин Исаков туһунан эттим. Ити түгэҥҥэ чоҕулуччу көрө-көрө, араастаан иэҕэҥнээн, уоһун имири-хомуру туттан, сото кэбиһэн олорор Гаврил Колесовы санаан кэллим. Билигин да төрөөбөтөх буолбат ээ… Гаврил Колесов истээччитин, көрөөччүтүн хара ааныттан салгыны эҕирийээт, болҕомтотун тардар, иһиттэр истэ олоруох курдук уратытык олоҥхолуура.