Олоҥхо Тыйаатырын “Күн Эрили” испиэктээҕэр сырыттыбыт

7ffde68b 4f149Олунньу 19 күнүгэр Олоҥхо Тыйаатырын Н.И. Степанов-Ноорой олоҥхотунан “Күн Эрили” оҕолорго аналлаах куукуланан испиэктээҕэр сырыттыбыт.

Оҕолорум сахалыы испиэктээххэ сылдьан сэргэхсийэн, төрөөбүт тылбыт алыптаах эйгэтигэр умсугуйан кэлбиттэриттэн астынным.
Олоҥхо Тыйаатырын кыра көрөөччүгэ аналлаах “Эрбэхчэй Бэргэн” испиэктээҕин 2019 с. көрөн турардаахпыт. Улахан дьоҥҥо аналлаах А.Е. Кулаковскай-Өксөкүлээх Өлөксөй “Саха дьахтарын сэттэ мэтириэтэ”, “Ойуун түүлэ”, “Үс кут” туруорууларыгар эмиэ астына-дуоһуйа сылдьыбыппыт.
Саха балаҕаныгар көмүлүөк оһох иннигэр олорор курдук истиҥ атмосфераҕа, бүөмчү эйгэҕэ баардыы сананным. Уопсайынан, театрга иммерсивнай (нууч. погружение) эффеги, буола турар хайааһыҥҥа өтөн, дириҥээн киирэри сэҥээрэр эбиппин. Ону театр кыра саалатыгар бүөмнээн олордоххо ордук билэр эбиккин.

Артыыстар эриэккэс оонньууларын ытыска ууран олорон көрөр буолан, уус-уран дьүһүлгэн бүтүннүү эккэр-хааҥҥар, санааҕар-онооҕор өтөн киирэр эбит. Бу өтөн киирэр (иммерсивнай) театр сахаҕа, быһыыта, бэрт чугас ээ. Саха киһитэ былыр кыараҕас балаҕанын иһигэр ойуун кыырарын, олоҥхоһут олоҥхотун, эбэ-эһэ остуоруйатын эмиэ бүүс-бүтүннүү кулгаах-харах иччитэ буолан, хайааһыҥҥа (действиеҕа) кыттыһан олорон көрдөҕө. Ол уус-уран ньыманы олоҥхо тыйаатыра бэккэ баһылаабыт уонна ураты буочар оҥостубут диэн көрдүм.

Сахаҕа чугас өҥ-дьүһүн (айылҕа сымна5ас өҥнөрө – хара, маҥан, бороҥ, кугас) туттуллара эмиэ саха киһитигэр ордук чугас. Минимализмҥа хабааттар сценография эмиэ олоҥхо тыйаатырын уратыта буоларын сэрэйдим, сэҥээрдим. Холобура, “Үс кут” испиэктээххэ оонньуу кистэлэҥ идеята олох мас (судургу оҥоһуулаах эрээри бөҕө-таҕа талах олоппос) тула сайдар. Олох мас геометрическай эриэккэс форматын туһанан, режиссер олох эгэлгэтин, уустук-судургу көстүүтүн дьон дьылҕатын кытта алтыһыннаран, мозаика курдук сааһылаан көрдөрөр, сайыннарар.
«Күн Эрили” куукуланан испиэктээххэ орто дойду остуол төгүрүмтэтинэн, саха төгүрүк сандалытынан көрдөрүллэр. Омос көрдөххө, судургу курдук эрээри, дириҥ, мындыр толкуй буолбатах дуо.
Норуот олоҕун быстыбат чааһа буолбут мал-сал испиэктээххэ эмиэ туһаныллар: оонньуур мас аттар, мас иһит. Ол чаҕылхай уокка-күөскэ, араас технологич.албаска, албын анимацияҕа үөрэммит аныгы киһиэхэ, ордук оҕоҕо, бэрт сонун уонна харахха, мэйиигэ сынньалаҥ буолла.
Сахалыы истилиистикэни оҕо тута ылынар, өйдүүр эбит. Дьиэбитигэр кэлэн баран театр туһунан кэпсэтиһии буолбутугар 5 саастаах кыыһым: “Ити куукулалар сирэйдэрэ наһаа маҥан, хатыҥ мастан оҥоһуллубут, ол иһин” диэн соһутта

Вернуться назад  

Коллектив театра

Линия жизни

Иван Шакуров

И.Ю. Пестряков

Афиша

Олоҥхо театра “Күн Эрили” диэн оҕолорго аналлаах куукуланан испэктээкилгэ ыҥырар
"Күн Эрили"Олунньу 19 20 күннэригэр 1100 1500 чаастан А.Е. Кулаковскай аатынан Норуоттар доҕордоһууларын Дьиэтигэр Олоҥхо...
Театр Олонхо приглашает на детский кукольный спектакль «Кюн Эрили»
Театр Олонхо 19 и 20 февраля 2021 г. в 1100 1500 ч. приглашает в Дом...

Поиск